គ្រូ​បង្វឹក Spurs ប្រាប់ Chelsea ថា៖ ជិតជួបគ្នាហើយយើង…

លោក Mauricio Pochettino បាន​ព្រមានដល់ Chelsea ថា​ Tottenham គឺ​ជា​ក្រុម​​ដែលកំពុង​តែ​ត្រៀម​លក្ខណៈ​រួច​រាល់​ក្នុងការ​ដណ្តើម​យក​ប្រៀប​ទៅ​លើ​ការភ្លាត់​ស្នៀត​ណាមួយ​ពីក្រុម​កំពុង​តែ​​នាំមុខលើ​តារាង​ក្រប​ខ័ណ្ឌ Premier League មួយនេះ​​។

Tottenham បានកាត់​បន្ថយ​គំ​លាត​​ដេញ​តាមពីក្រោយក្រុម Chelsea ឲ្យ​នៅ​ត្រឹម​៧​ពិន្ទុកាលពី​ថ្ងៃសៅរ៍ ខណៈ​ដែលពួកគេ​បាន​ទទួល​ជ័យជម្នះ ២-០ នៅ​លើ​ទឹក​ដីក្រុម Burnley ស្រប​ពេលដែលគូ​ប្រជែង​ស្ថិតក្នុង​ទីក្រុង​ឡុងដ៍​របស់​ពួកគេ បាន​រង​បរា​ជ័យ​ដ៏​មិន​នឹកស្មាន​ដល់​ក្នុងលទ្ធផល ២-១ ក្នុងផ្ទះខ្លួន​ឯង ពេល​ប៉ះក្រុម​ Crystal Palace​។ ស្រប​ពេល​ដែល​នៅ​សល់​ការ​ប្រកួត​ត្រឹម​តែ​៩​លើក​ទៀត ក្រុម Spurs របស់​លោក Pochettino បាន​ធ្វើ​ឲ្យពួក​គេផ្ទាល់​មាន​ឱកាសក្នុង​ការ​ដាក់​សម្ពាធ​លើ​ក្រុម Chelsea ជាលើក​ទី​១​នៅ​រដូវកាលនេះ​។ ការ​ប្រជែង​ដណ្តើម​ពាន​អាច​នឹង​ស្ថិតក្នុង​លក្ខណៈកាន់​តែ​បើក​ចំ​ហ​បន្ថែមទៀតបន្ទាប់​ការ​ប្រកួតនៅ​ថ្ងៃពុធ​ខាងមុខនេះ ខណៈ​​ដែល​ក្រុម Chelsea នឹង​ត្រូវ​ប៉ះ​ជាមួយនឹងក្រុម​ជើងខ្លាំង Manchester City នៅកីឡដ្ឋាន Stamford Bridge ស្រប​​ពេល​ដែលក្រុម Tottenham ធ្វើ​ដំណើរ​ទៅជួបក្រុម Swansea។



ខណៈ​ដែល Chelsea ហាក់​បាន​បង្ហាញពី​ការ​ធ្លាក់​ទម្រង់​លេង លោក Pochettino បាន​បញ្ជាក់​ថា​ក្រុម Pochettino ត្រូវ​តែ​ដណ្តើម​យក​ប្រៀប​ផ្សេង​ៗ ប្រសិន​បើ​ក្រុម​តោ​ខៀវ​មួយ​នេះ ភ្លាត់​ស្នៀត​ម្តង​ទៀត​។ គ្រូ​បង្វឹក​រូបនេះ​បាន​ឲ្យ​ដឹង​ថា៖ «ពេល​នេះ យើងកំពុង​តែ​​ដេញ​តាមពីក្រោយ​៧​ពិន្ទុ ដែល​ខុស​គ្នា​ទាំង​ស្រុង​ទៅនឹងការ​ដេញ​តាម​ពីក្រោយ​​១០ពិន្ទុ​។ ប៉ុន្តែ វា​នៅ​តែ​មានការ​ងារ​ជាច្រើន​ទៀត​​ដែល​ត្រូវ​ធ្វើ​។ វា​មិន​មែនអាស្រ័យ​ទៅលើ​យើងឡើយ ប៉ុន្តែ វា​​អាស្រ័យ​ទៅលើថា Chelsea ភ្លាត់​ស្នៀត ឬ​អត់​។ ប៉ុន្តែ នៅ​ពេល​ដែល​ពួកគេ​ភ្នាត់​ស្នៀត យើង​ត្រូវ​តែ​ធ្វើ​ការ​ងារ​របស់​យើង​»​៕

ប្រភព​ព័ត៌មាន៖ worldsoccerltalk