ប្រផ្នូលនិងអត្ថន័យ ពេលសុបិនឃើញចន្ទគ្រាសឬសូរ្យគ្រាស
ចន្ទគ្រាសនិងសូរ្យគ្រាសជាបាតុភូតមួយកម្រកើតឡើង រហូតមានអ្នកខ្លះមានជំនឿផ្សេងៗគ្នាទៅលើបាតុភូតនេះ។ ចុះបើមនុស្សម្នាក់សុបិនឃើញមានសូរ្យគ្រាសឬចន្ទគ្រាស តើមានន័យនិងប្រផ្នូលយ៉ាងណាទៅវិញ។
បើតាមការបកស្រាយបែបចិត្តសាស្ត្រ
ការយល់សុបិនឃើញចន្ទគ្រាសឬសូរ្យគ្រាស គឺបានន័យថា អ្នក នឹងជួបការលំបាកជាច្រើននៅពេលអនាគត។ បាតុភូតទាំងនោះតំណាងភាពខ្មៅងងឹត ដែលនឹងកើតឡើងចំពោះអ្នកដែលយល់សុបិនឃើញវា។ អ្នកមានអារម្មណ៍ថា ជីវិតអ្នកហាក់គ្មានការរីកចម្រើន ខណៈមនុស្សនៅជុំវិញខ្លួនកំពុងត្រេកត្រអាលនឹងជោគជ័យ និងគេងផលចំណេញលើរូបអ្នក។
វាអាចបង្ហាញនូវភាពភ័យខ្លាចណាមួយក្នុងចិត្តអ្នក ដែលពេលខ្លះសូម្បីតែអ្នកខ្លួនឯងក៏ពិបាកនឹងនិយាយថាភាពភ័យខ្លាចនោះជាអ្វីជាអ្វីប្រាកដ។ ការយល់សុបិនបែបនេះ តែងនាំនូវការផ្លាស់ប្តូរច្រើនក្នុងជីវិតអ្នក គ្រាន់ពិបាកនិយាយថា វាវិជ្ជមានឬអវិជ្ជមាន។
មនុស្សមួយចំនួនដែលសុបិនឃើញ ចន្ទគ្រាសឬសូរ្យគ្រាស គឺដោយសារពួកគេកំពុងតែបាក់ទឹកចិត្តធ្ងន់ធ្ងរ។ ពួកគេភ័យខ្លាចបាត់បង់មនុស្សជាទីស្រឡាញ់ ដែលកំពុងមានជំងឺធ្ងន់កន្លងមក។ អ្នកខ្លះយល់សុបិនបែបនេះ អាចដោយសារអារម្មណ៍ខ្លាចប្រឡងធ្លាក់ និងបរាជ័យលើអ្វីមួយក្នុងជីវិត។
- សុបិនឃើញសូរ្យគ្រាសឬចន្ទគ្រាសពេញ៖ សុបិនបែបនេះបានន័យថា អ្នកកំពុងបាក់ទឹកចិត្តខ្លាំងក្នុងជីវិត។
- មានអារម្មណ៍សប្បាយពេលសុបិនឃើញចន្ទគ្រាសឬសូរ្យគ្រាស៖ មានន័យថាអារម្មណ៍អ្នកនៅតែដក់ជាប់នឹងអ្វីមួយដែលកន្លងទៅជាយូរណាស់ហើយ។
- យំពេលសុបិនឃើញចន្ទគ្រាសឬសូរ្យគ្រាស៖ អ្នកនឹងប្រទះភាពអួអាប់ក្នុងជីវិត។
- សុបិនឃើញចន្ទគ្រាសឬសូរ្យគ្រាសបានបញ្ចប់៖ បានន័យថា អ្នកនឹងទទួលបានភាពត្រចះត្រចង់ចំណេះដឹងថ្មី និងពន្លឺថ្មីក្នុងជីវិត។
បើតាមការបកស្រាយបែបសាសនាឥស្លាម ការយល់សុបិនឃើញចន្ទគ្រាសឬសូរ្យគ្រាស មានន័យថា នឹងកើតមានអន្តរាយឬហេតុការណ៍ណាមួយកើតឡើងចំពោះថ្នាក់ដឹកនាំប្រទេស។
វាក៏អាចបង្ហាញ ឲ្យឃើញពីសេចក្ដីស្លាប់ឬគ្រោះថ្នាក់ផ្សេងៗ ដែលនឹងកើតឡើងលើម្តាយឬប្រពន្ធរបស់ម្ចាស់យល់សុបិន។
បើក្នុងករណីយល់សុបិនឃើញពពកបាំងព្រះអាទិត្យជិត នោះបានន័យថា រឿងអាក្រក់ក៏នឹងកើតឡើងក្នុងប្រទេស ឬការគ្រប់គ្រងរបស់ថ្នាក់ដឹកនាំទុច្ចរិតក្នុងប្រទេសនោះ នឹងត្រូវដួលរលំ។
យ៉ាងណានេះគ្រាន់តែជាការបកស្រាយផ្សេងៗគ្នាបែបចិត្តសាស្រ្តនិងសាសនា ដោយផ្នែកលើការសិក្សាពីអារម្មណ៍និងការគិតរបស់អ្នកសុបិន និងជំនឿលើសាសនា។ បើអ្នកយល់សុបិនបែបនេះ អាចព្យាយាមសង្កេតមើលដោយខ្លួនឯងថា តើនឹងមានរឿងកើតឡើងក្នុងជីវិតនិងមនុស្សជុំវិញខ្លួនអ្នកឬយ៉ាងណា៕
ប្រភព៖ Sabay
ប្រផ្នូលនិងអត្ថន័យ ពេលសុបិនឃើញចន្ទគ្រាសឬសូរ្យគ្រាស
Reviewed by Mong Kul
on
8:50 PM
Rating:
Reviewed by Mong Kul
on
8:50 PM
Rating:
No comments: