របៀបធ្វើ ត្រីបំពងនំបញ្ចុកទឹកត្រីអំពិលទុំ

ត្រីបំពងនំបញ្ចុកទឹកត្រីអំពិលទុំ វាជាចំនូូលចិត្តសម្រាប់សមាជិកគ្រួសាររបស់ខ្ញំុ ទៀតសោតចំពោះមុខម្ហូបនេះវាមិនមានអីលំបាកទេសម្រាប់អ្នកចំអិន។ តោះសាកល្បងទាំងអស់គ្នានូវមុខម្ហូបមួយនេះ!

គ្រឿងផ្សំ‬

• ត្រីរស ១ ប្រហែល ៨ខាំ ទៅ ១គីឡូក្រាម
• អំពិលទុំ ២ស្លាបព្រាបាយ
• ខ្ទឹមក្រហម ៣ដុំហាន់ស្តើងៗ
• ខ្ទឹមសចិញ្រ្ចាំ ៥កំពិស
• ម្ទេស ៥ផ្លែហាន់ស្តើងៗ
• ប៊ីចេងបន្តិច
• អំបិលបន្តិច
• ទឹកត្រី ៥ស្លាព្រាបាយ
• ស្ករ ៥ស្លាព្រាបាយ
• ទឹក កន្លះចានចង្កិះ
• ប្រេងឆា
• គល់ស្លឹកគ្រៃ ១គល់ ស្លឹកក្រូចសើច ២សន្លឹក
• នំបញ្ចុក
• បន្លែរួមមាន សាឡដ ត្រសក់ សណ្តែកបណ្តុះ ស្តៅ (ដាំទឹកស្រុះ) ជីរ

‪របៀបធ្វើទឹកត្រីអំពិលទុំ‬

1. ដាក់អំពិលត្រាំទឹក ច្របាច់អោយចេញសាច់អំពិល ស្រង់គ្រាប់ចេញ។
2. ដាំខ្ទះអោយក្តៅ ដាក់ខ្ទឹមស និងម្ទេសបំពងអោយប្រែពណ័ សឹមដាក់ខ្ទឹមក្រហម ឆាពីរបីត្រឡប់ ដាក់ទឹកអំពិលទុំ ផ្សំរសជាតិដោយ ស្ករ ទឹកត្រី ប៊ីចេង និងអំបិល ទុកអោយពុះរាងខាប់បន្តិច ភ្លក្សរសជាតិតាមចំនូលចិត្ត (ផ្អែម ប្រៃ ជូ)។

‎របៀបធ្វើ‬

1. រៀបបន្លែ និងនំបញ្ចុកដាក់ចានមួយទុកមួយអន្លើ។
2. យកត្រីលាងទឹកច្របាច់អំបិលអោយអស់រំអិល សឹមយកគល់ស្លឹកគ្រៃ រុំជាមួយស្លឹកក្រូចញោតចូលក្នុងពោះត្រី។
3. ដាំប្រេងឆាអោយក្តៅ ដាក់ត្រីបំពងអោយឆ្អិន (ប្រើភ្លើងតិចៗ) រួចស្រង់ទុកញុាំផ្ទាប់ជាមួយបន្លែ និងជ្រលក់ជាមួយទឹកត្រីអំពិលទុំជាការស្រេច៕

អ្នកស្រី សុគន្ធារី