របៀបធ្វើ សម្លរម្ជូគ្រឿងត្រប់ពុតលំញង (ត្រប់ចង្កោម)

របៀបធ្វើ សម្លរម្ជូគ្រឿងត្រប់ពុតលំញង (ត្រប់ចង្កោម) អ្នកខ្លះគាត់ធ្លាប់ហូប អ្នកខ្លះគាត់អត់ធ្លាប់ហូប សម្រាប់សម្លរម្ជូគ្រឿងប្រភេទនេះ។ ខាងក្រោមនេះយើងនឹងរៀបរាប់អំពីរបៀបចំអិនវា ដែលអ្នកមើលទៅងាយយល់បំផុត តោះសាកល្បងទាំងអស់គ្នា!

គ្រឿងផ្សំ

• ឆ្អឹងជំនី និងគ្រឿងក្នុងជ្រូក ១គីឡូ៣ខាំ
• គ្រឿងបុក ១ចានចង្កិះ (គល់ស្លឹកគ្រៃ រំដេង រមៀត ស្លឹកក្រូចសើច ខ្ទឹមស ម្ទេស)
• ត្រប់ពុតលំញង ៣ខាំ
• ស្ករ ២ស្លាបព្រាបាយ
• ទឹកត្រី ៣ស្លាបព្រាបាយ
• ម្សៅស៊ុប ១ស្លាបព្រាបាយ
• ប្រហុកចិញ្រ្ចាំ ១ស្លាបព្រាបាយ
• អំបិលបន្តិច
• អំពិលទុំ ២ស្លាបព្រាបាយ
• ប្រេងឆា ១ស្លាបព្រាបាយ
• ស្លឹកកន្រ្ទោប ៣ធាង
• ទឹក ៣ចានចង្កិះ

របៀបធ្វើ

1. ដាំប្រេងឆាអោយក្តៅ ដាក់គ្រឿងបុកចូល ឆាប្រហែល១នាទី ដាក់ប្រហុកចូលឆាបីបួនត្រឡប់ ដាក់ត្រប់ពុតលំញងចូលឆាអោយត្រប់ស្លោកប្រហែលជា ១០នាទី។
2. ដាក់សាច់ចូល ឆាបីបួនត្រឡប់ រួចដាក់គ្រឿងផ្សំរសជាតិដូចជា អំពិលទុំ អំបិល ទឹកត្រី ស្ករ ម្សៅស៊ុប និងស្លឹកកន្រ្ទោប (ដុតអោយគ្រៀម) រំងាស់អោយដាច់ទឹក។
3. ដាក់ទឹកចូល ទុកអោយពុះមួយសន្ទុះ (សាច់ផុយ) ភ្លក្សរសជាតិតាមចំនូលចិត្ត ជាការស្រេច៕

* សម្រាប់ម្ទេសប្លោកដាក់ក៏បានមិនដាក់ក៏បានតាមចំនូលចិត្ត

អ្នកស្រី សុគន្ធារី