ក្រុមអាហ្សង់ទីនកំពុងមានវិបត្តិ ប្រឈមនឹងការបាត់បង់កៅអីនៅ World Cup
ក្រុមបាល់ទាត់ជម្រើសជាតិអាហ្សង់ទីន ដែលមានចំណាត់ថ្នាក់លេខ២ក្នុងពិភពលោក កំពុងតែប្រឈមមុខនឹងការខកខានក្នុងការឈានទៅប្រកួតព្រឹត្តិការណ៍ World Cup ជាលើកទីមួយ បើគិតចាប់តាំងពីឆ្នាំ១៩៧០ ក្រោយពីការជាប់ពិន័យព្យួររបស់ខ្សែប្រយុទ្ធ Lionel Messi និងការរងបរាជ័យដ៏អាម៉ាស់ក្រោមស្នាដៃក្រុមជម្រើសជាតិបូលីវី។
វិបត្តិរបស់ក្រុមម្ចាស់ជើងឯកពិភពលោកពីរសម័យកាលមួយនេះ កាន់តែលិចលុងបន្ថែមទៀត នៅពេលដែលសហព័ន្ធកីឡាបាល់ទាត់អាហ្សង់ទីន បានតែងតាំងសមាជិកប្រតិបត្តិថ្មីជាច្រើននាក់កាលពីថ្ងៃពុធ។ សមាជិកប្រតិបត្តិទាំងនោះនឹងត្រូវមានការងារក្នុងការបញ្ចប់ការជ្រួលច្របល់រយៈពេល៣ឆ្នាំក្នុងកីឡាបាល់ទាត់អហ្សង់ទីន ប៉ុន្តែ ក្រុមអ្នកវិភាគបានបញ្ជាក់ថា ការតែងតាំងនេះត្រូវបានធ្វើឡើងក្រោមឥទិ្ធពលនយោបាយ។ ការរងបរាជ័យក្រោមស្នាដៃក្រុមជម្រើសជាតិបូលីវី បានបង្កើតឲ្យមានពាក្យចរចាមអារ៉ាមថា វិធានការមួយក្នុងចំណោមវិធានការថ្មីៗផ្សេងៗរបស់សហព័ន្ធកីឡាបាល់ទាត់អាហ្សង់ទីន អាចជាការបណ្តេញលោកគ្រូបង្វឹក Edgardo Bauza ចេញពីតំណែង។
ប៉ុន្តែ វាប្រហែលជាយឺតពេលបន្តិចហើយក្នុងការជួយឲ្យក្រុមបាល់ទាត់ជម្រើសជាតិអាហ្សង់ទីន ឈ្នះកៅអីទៅកាន់រុស្ស៊ី ដើម្បីផ្តល់ការរីករាយដល់អ្នកគាំទ្ររបស់ខ្លួនទូទាំងពិភពលោកក្នុងយុទ្ធនាការ World Cup នៅឆ្នាំក្រោយ។ FIFA បានដាក់ពិន័យព្យួរទៅលើតារាឆ្នើម Messi របស់អាហ្សង់ទីនចំនួន៤ប្រកួត កាលពីថ្ងៃអង្គារ សម្រាប់ការប្រើពាក្យសម្តីប្រមាថទៅលើជំនួយការអាជ្ញាកណ្តាលម្នាក់ក្នុងការប្រកួតមួយជាមួយនឹងក្រុមជម្រើសជាតិស៊ីលី កាលពីសប្តាហ៍មុន។ លោក Cesar Menotti អតីតគ្រូបង្វឹករបស់ក្រុមជម្រើសជាតិអាហ្សង់ទីន បានឲ្យដឹងថា៖ «ការពិន័យ៤ប្រកួតពិតជាធំពេកហើយ។ មានកំហុសធំៗជាច្រើនដែលជាប់ពិន័យព្យួរតែ២ប្រកួតប៉ុណ្ណោះ ហើយនេះគ្រាន់តែកំហុសទៅលើពាក្យសម្តីប៉ុណ្ណោះ»៕
ប្រភពព័ត៌មាន៖ worldsoccertalk
ក្រុមអាហ្សង់ទីនកំពុងមានវិបត្តិ ប្រឈមនឹងការបាត់បង់កៅអីនៅ World Cup
Reviewed by Mong Kul
on
12:46 AM
Rating:
Reviewed by Mong Kul
on
12:46 AM
Rating:
No comments: