ស្រី្តមានផ្ទៃពោះ ៥ ខែរងរបួស ពេលតុលាការកាត់ទោស ទេព វន្នី ២ឆ្នាំកន្លះ
ភ្នំពេញៈ ស្ត្រីសកម្មដីធ្លីម្នាក់ដែលមានផ្ទៃពោះ ៥ ខែ និងសកម្មជន ៣នាក់ផ្សេងទៀង រងបួសនៅពេលមានការប៉ះទង្គិចគ្នាមួយប្រាវ នៅព្រឹកនេះ ស្របពេលដែលសាលាដំបូងរាជធានីភ្នំពេញ បានសម្រេចផ្តន្ទាទោស សកម្មជនដីធ្លីតំបន់បឹងកក់អ្នកស្រី ទេព វន្នី ដាក់ពន្ធនាគារ ២ ឆ្នាំកន្លះ តាមបណ្តឹងរបស់សន្តិសុខខណ្ឌដូនពេញពាក់ព័ន្ធនឹងហិង្សាក្បែរផ្ទះលោកនាយករដ្ឋមន្ត្រីហ៊ុន សែន កាលពីឆ្នាំ ២០១៣។
អំឡុងពេលចៅក្រមសាលាដំបូងរាជធានីភ្នំពេញ កំពុងបើកសវនាការលើសំណុំរឿង ហិង្សាកាលពីឆ្នាំ ២០១៣ ក៏មានហិង្សាមួយកើតឡើងនៅមុខសាលាដំបូងរាជធានីភ្នំពេញរវាង សន្តិសុខខណ្ឌ ៧មករា និងសកម្មជនដីធ្លីប្រមាណ ៥០នាក់ដែលមកគាំទ្រអ្នកស្រី ទេព វន្នី។
តំណាងសហគមន៍បឹងកក់ កញ្ញា សង់ ស្រីលាភ បានបានរៀបរាប់ព្រឹត្តិការណ៍ថា នៅពេលលឺថា មន្ត្រីពន្ធនាគារដឹកអ្នកស្រី ទេព វន្នី ត្រឡប់ទៅវិញ ពួកគេក៏ទៅមុខតុលាការ ដើម្បីគាំទ្រតំណាងរបស់ខ្លូន តែត្រូវបានអាជ្ញាខណ្ឌហាមឃាត់។
អ្នកស្រីថា «សន្តិសុខខណ្ឌបានព្យាយាមហាមឃាត់យើងមិនឱ្យចូលមុខតុលាការទេ ពេលនោះក៏មានការប្រតាយប្រតប់គ្នា ដោយសន្តិសុខបានច្រានយើង និងព្យាយាមវាយយើងរហូតមានរបួសបួននាក់ខ្ញុំក៏ត្រូវបានគេវាយ»។
បើតាមកញ្ញា សង់ ស្រីលាភ ស្រីម្នាក់មានផ្ទៃពោះ ៥ខែ នៅសហគមន៍បុរីកីឡា រងរបួស ខណៈអ្នកស្រី បូវ សោភា សកម្មជនម្នាក់ទៀតសន្លប់ ហើយបានបញ្ជូនទៅមន្ទីរពេទ្យទាំងពីរនាក់។ ចំណែកអ្នករត់រម៉កកង់បីក៏ត្រូវបានសន្តិសុខដេញវាយគាត់រហូតដល់ផ្សារស៊ីធីម៉ល នៅពេលគាត់ព្យាយាមជួយខ្ញុំ។
មុនពេលកើតមានហិង្សានេះ ឃើញមានអាជ្ញាធរកាន់អាយកូមបាន ទូរស័ព្ទប្រាប់គ្នាឱ្យយកកម្លាំងមកដោយ ដើម្បីបញ្ជៀសសកម្មជនចេញពីមុខតុលាការ ដោយថាពួកគាត់ស្រែកឡូឡា បង្កការរំខានដល់តុលាការ។
ចំណែករឿងក្តីអ្នកស្រីទេព វន្នី វិញ ត្រូវបានចៅក្រមជំនុំជម្រះសាលាដំបូងរាជធានីភ្នំពេញ លោក ឡុង កេសភីរម្យ សម្រេច ផ្តន្ទាទោស ២ ឆ្នាំ កន្លះ ចោទពីបទហិង្សាដោយចេតនា មានស្ថានទម្ងន់ទោសតាមមាត្រា ២១៨ នៃក្រមព្រហ្មទណ្ឌ និងពិន័យជាប្រាក់ ១៤ លានរៀលដោយ ៥លានរៀលបង់ចូលរដ្ឋ និង ៩លានរៀលផ្តល់សំណងទៅឱ្យដើមបណ្តឹង។
ការផ្តន្ទាទោសនេះ ត្រូវបានមន្ត្រីការពារសិទ្ធិមនុស្ស មេធាវីការពារក្តីនេះសម្តែងការសោក និងចាត់ទុកថាជារឿងអយុត្តិធម៌។
បងស្រីអ្នកស្រី ទេព វន្នី គឺអ្នកស្រី ហួត ចាន់វណ្ណ ប្រតិកម្មថា ជាសង្គមអយុត្តិធម៌។
អ្នកស្រីថា«អយុត្តិធម៌ណាស់ ប្អូនស្រីខ្ញុំគ្មានកំហុងដូចការចោទប្រកាន់ទេ នាងជាមនុស្សស្លួតត្រង់ ហេតុបានអ្នកប្រព្រឹត្តរួចខ្លួនទៅវិញ ហើយគ្រួសារខ្ញុំមានលុយឯណាផ្តល់សំណងទៅគេនោះ»។
ស្រី្តមានផ្ទៃពោះ ៥ ខែរងរបួស ពេលតុលាការកាត់ទោស ទេព វន្នី ២ឆ្នាំកន្លះ
Reviewed by Mong Kul
on
11:23 PM
Rating:
Reviewed by Mong Kul
on
11:23 PM
Rating:
