ព្រោះតែសាំង ១លីត្រ ផ្ដាច់ជីវិតមនុស្សម្នាក់

គណនីហ្វេសប៊ុក Chea Bunthoeurn បានរៀបរាប់ពីរឿងរ៉ាវដ៏ហួសចិត្តមួយ ដែលបានកើតឡើងក្នុងសង្គមខ្មែរយើង ពិតជាឈឺចាប់ពើតផ្សាណាស់ មិនគួរណាមនុស្សខ្មែរ បែរជារស់នៅអាត្មានិយម ថោកទាបហួសពីសត្វតិរិច្ឆានបែបនេះសោះ ។

“យប់ម្សិលមិញ​ ចេញពីចាក់កុនគណបក្សវិញម៉ោងប្រហែល១១យប់ខ្ញុំបើកឡានត្រឡប់មកផ្ទះវិញ​ មកដល់ភូមពារា​ម ឃុំពារាម​ ទឹកដីស្រុកបាទី​ ឃើញប្ដីប្រពន្ធពីរនាក់​ ប្រពន្ធដេកដួលលើកណ្ដាលផ្លូវលំ​ ​ចំណែកប្ដីស្រែកយំអោបប្រពន្ធ ខ្ញុំឃើញគាត់ដំបូងស្មានតែគាត់ទើបតែដួលម៉ូតូភ្លាមៗ​ ព្រោះឃើញដេកដួលលើផ្លូនិងអត់មានអ្នកណាមួយក្នុងភូមិនេះចេញមកមើលសោះ។​ ខ្ញុំឈប់ឡានមើលគាត់ ស្រាប់តែគាត់ស្រែកយំសំពះខ្ញុំអោយជួយប្រពន្ធគាត់ផង​ ហើយគាត់បន្តរថាប្រពន្ធគាត់ឈឺធ្ងន់ជាជំងឺបេះដូង​ គាត់ដឹកប្រពន្ធទៅពេទ្យតែម៉ូតូអស់សាំង​រលត់ទៅមុខលែងរួច​ ហើយគាត់រត់ទៅដាស់ផ្ទះលក់ចាបហួយដែលមានលក់សាំងផង​ ស្រាប់តែគេមិនចេញលក់អោយគាត់សោះ​។



ខ្ញុំស្ដាប់គាត់មិនទាន់ទាំងចប់ត្រង់ចំណុចនេះផងអារម្មណ៌រុញខ្ញុំអោយទៅស្រែកដាស់ហៅអ្នកលក់ណឹងភ្លាមៗ​ ខ្ញុំស្រែកអស់ពីពោះ​ ​គោះរបងដែកផ្ទះផង​ស្រែកផង​ សំឡេងស្រែកនិងគោះក៏ខ្លាំង​ ចំណែកសំឡេងឆ្កែព្រុះរំពងពេញភូមិក៏រឹតតែខ្លាំង​ តែនៅម្ចាស់ផ្ទះនេះមិនចេញមកសោះ​។ ខ្ញុំស្រែកហៅទាំងអ្នកភូមិក្បែរណឹងដែលមានផ្ទះជាប់គ្នាចាក់ស្រេះ​តែសូម្បីតែម្នាក់ដែលចេញមកមើលក៏គ្មានដែរ​ ខ្ញុំស្រែកអស់ចិត្ត ខ្ញុំវិលមកសួរប្ដីគាត់វិញថាពូអស់សាំងហើយស្រែកហៅគេប៉ុន្មាននាទីហើយ​ គាត់ថាប្រហែលមួយម៉ោងជាងហើយ​ ខ្ញុំលឺហើយថែមទាំងឃើញបែបណឹងផ្ទាល់ភ្នែក​ ខ្ញុំទប់អារម្មណ៌ជាមួយម្ចាស់ផ្ទះណឹង​ ជាមួយអ្នកភូមណឹងអត់ចង់បានសោះ​ ម៉េ​ចក៏មនុស្សនេះម៉េចអ្នកភូមិនេះអាត្មានិយមម្លេះ​? ម៉េចក៏ដាច់ចិត្តទុកអោយមនុស្សម្នាក់អោយដេកស្លាប់​ ដែលគ្រាន់តែសាំងមួយលីតយើងអាចសង្គ្រោះគាត់បានសោះ?​ ម៉េចមិនចេញមកមើលជួយរកមន្យោបាយគាត់ផងទៅ​?



ខ្ញុំរកអ្វីបូមសាំងឡានខ្ញុំអត់បានសោះតែប្ដីគាត់ស្រែកយំមកថាក្មួយអើយមិនបាច់ទេព្រោះប្រពន្ធគាត់ផុតតាំងពីក្មួយអត់ទាន់មកដល់ម្លេះ។​ ខ្ញុំមើលមុខគាត់ចំម្ដងទៀតទើបខ្ញុំស្គាល់ថាគាត់ជាអ្នកលក់បង្អែមនៅមុខសាលា​អតីតវិទ្យាល័យខ្ញុំរៀនគឺសាលា១មិថុនា​ ប្ដីឈ្មោះម៉ោង​ ប្រពន្ធឈ្មោះសាវឿន(អត់សូវច្បាសឈ្មោះប្រពន្ធ)ហើយគាត់ជាសកម្មជនរបស់គណបក្សសង្គ្រោះជាតិចាសឆ្នាំ​ រស់នៅក្នុងភូមិក្រាំងក្រចាំ​ង ឃុំពារាម​ស្រុកបាទី​ ខេត្តតាកែវ។​ ខ្ញុំក៏លើកសពប្រពន្ធគាត់ដាក់លើឡានទីកូដឹកកុនពណ៌ក្រហមរបស់ខ្ញុំ​ ដើម្បីដឹកគាត់ទាំងពីរនាក់មកផ្ទះគាត់វិញទាំងអារម្មណ៌មិនអស់ចិត្តនឹងផ្ទះលក់សាំងនិងអ្នកភូមិណឹងសោះមួយម៉ោងជាងនៃការស្រែកដង្ហោយអោយគេជួយប្រពន្ធ​ អត់មានអ្នកណាម្នាក់យកសំឡេងដែលចូលក្នុងត្រចៀករុញអោយចូលក្នុងបេះដូង​ ច្រានខ្លួនអោយចេញមកមើលគាត់សោះ។”

ប្រិយមិត្ត 8News ជាទីរាប់អាន! ចារិកលក្ខណៈសម្បត្តិដូនតាយើងពីដើមមក មិនមែនជាមនុស្សអាត្មានិយម យករួចតែខ្លួនបែបនេះទេ គឺជាមនុស្សដែលចេះជួយទុក្ខធុរៈគ្នា មិនថាក្នុងសង្គម ឬប្រទេសជិតខាងនោះទេ។ ហេតុអីមនុស្សខ្មែរបច្ចុប្បន្ននេះ ប្រែក្លាយទៅជាមនុស្សដូចគល់ឈើ មានភ្នែកមិនចេះមើល មានត្រចៀកមិនចេះស្ដាប់ មិនចិត្តតែមិនរំជើបរំជួល មិនចេះឈឺឆ្អាលជួយគ្នាបែបនេះទៅវិញ? តើមនុស្សខ្មែរ ពិតជាអាត្មានិយម សុខចិត្តឲ្យមនុស្សស្លាប់នៅនឹងមុខ មិនចេះមកជួយបែបនេះ? នេះជាដំណើរវិវត្តិន៍ទៅរកការបាត់បង់ទឹកដីហើយ ប្រទេសជាតិរលាយហ៊ិនហោច ខ្ទេចខ្ទីអស់ គឺដោយសារក្នុងសង្គមសំបូរទៅដោយមនុស្សអាត្មានិយមយករួចតែខ្លួនបែបនេះឯង៕