មិនចេះចប់ មិនចេះហើយ! បំផ្ទុះគ្រាប់បែកអត្តឃាត នៅកណ្តាលទីក្រុងឥណ្ឌូនេស៊ី ស្លាប់ច្រើននាក់

មនុស្សចំនួន ៥ នាក់ បានស្លាប់បាត់បង់ជីវិត នៅក្នុងហេតុការណ៍ដែលគេសង្ស័យថា ជាការបំផ្ទុះគ្រាប់បែកអត្តឃាត ចំនួន ២ នៅឯស្ថានីយរថយន្តក្រុង ក្នុងទីក្រុងហ្សាការតា ប្រទេសឥណ្ឌូនេស៊ី កាលពីវេលាម៉ោង ៩ យប់ (ម៉ោងនៅឥណ្ឌូនេស៊ី) ថ្ងៃ ពុធ ទី ២៤ ម្សិលមិញនេះ។

បើយោងតាមសារព័ត៌មាន Dailymail បានឲ្យដឹងថា ប៉ូលិសចំនួន ៣ នាក់ និង បុរសជាជនសង្ស័យបំផ្ទុះគ្រាប់បែកអត្តឃាត ២ នាក់ បានស្លាប់នៅក្នុងហេតុការណ៍បំផ្ទុះ ចំនួន ២ ដែលកើតឡើងមុនក្រោយគ្នាតែ ៥ នាទីប៉ុណ្ណោះ នៅឯស្ថានីយរថយន្តក្រុង Kampung Melayu។
ជាមួយគ្នានេះដែរ មនុស្សយ៉ាងហោចណាស់ ១០ នាក់ បានរងរបួស ដោយក្នុងនោះរួមមាន មន្ត្រី ៥ នាក់ និង ជនស៊ីវិល ៥ នាក់។

គួរបញ្ជាក់ផងដែរថា ប្រទេសឥណ្ឌូនេស៊ី បានជួបប្រទះការវាយប្រហារកម្រិតទាបជាច្រើន ចាប់តាំងពីខែមករា មក ខណៈរដ្ឋអ៊ីស្លាម ISIS បានអះអាងថា ពួកគេជាអ្នកវាយប្រហារ កាលពីខែមករា នោះ ហើយវាក៏ជាការវាយប្រហារលើកដំបូងរបស់ពួកគេ នៅតំបន់អាស៊ីអាគ្នេយ៍ ផងដែរ។ នេះបើយោងតាមសារព័ត៌មាន BBC។

ទោះជាយ៉ាងណា សារព័ត៌មាន Channelnewsasia បានឲ្យដឹងថា គេមិនទាន់ដឹងច្បាស់នៅឡើយទេថា នរណាជាអ្នកនៅពីក្រោយហេតុការណ៍បំផ្ទុះគ្រាប់បែកខាងលើ ប៉ុន្តែ ឥណ្ឌូនេស៊ី បានបង្កើនការប្រុងប្រយ័ត្នខ្ពស់ណាស់ បន្ទាប់ពីធ្លាប់ទទួលរងការវាយប្រហារជាច្រើន ដោយពួកសកម្មប្រយុទ្ធ ដែលបំផុសគំនិតដោយរដ្ឋអ៊ីស្លាម ISIS៕