ហ៊ុន សែន ព្រមានប្រើកម្លាំងយោធាចំពោះបក្សនយោបាយដែលចង់កម្ចាត់រដ្ឋាភិបាល
លោកនាយករដ្ឋមន្ត្រីព្រមានទៅអ្នកនយោបាយដែលចង់កម្ចាត់រដ្ឋាភិបាលក្រោយការចាញ់ឆ្នោត តែមិនប្រគល់អំណាច។ លោក ហ៊ុន សែន អះអាងថា ការចង់កម្ទេចរដ្ឋាភិបាលនេះ គឺមិនមែនជារឿងដែលងាយស្រួលប៉ុន្មាននោះឡើយ ព្រោះលោកមានយោធាពេញនៅក្នុងដៃ។ អ្នកនាំពាក្យគណបក្សប្រឆាំងយល់ឃើញថា គ្មានបក្សនយោបាយណាមួយចង់បានការផ្លាស់ប្ដូរដោយហិង្សាឡើយ ហើយម្យ៉ាងទៀត បក្សនយោបាយទាំងនោះ ចង់បានការដោះស្រាយបញ្ហាប្រកបដោយសន្តិវិធី។
សារគំរាមជាថ្មីទៀតរបស់ប្រធានគណបក្សប្រជាជនកម្ពុជា នៅពេលនេះ ត្រូវបានអ្នកធ្វើកិច្ចការលើការបោះឆ្នោតចាត់ទុកថា នេះអាចជាទម្លាប់របស់លោក ហ៊ុន សែន ទៅហើយ ដែលចូលចិត្តនិយាយដដែលៗ និងបង្កប់ន័យហិង្សា ដោយសំអាងតែទៅលើយោធា ប៉ុន្តែសារនយោបាយនេះ នឹងមិនជះឥទ្ធិពលដល់ការសម្ដែងឆន្ទៈនយោបាយរបស់ពលរដ្ឋតាមរយៈការបោះឆ្នោតឡើយ។
លោក សំ គន្ធាមី នាយកប្រតិបត្តិគណៈកម្មាធិការអព្យាក្រឹត្យ និងយុត្តិធម៌ ដើម្បីការបោះឆ្នោតដោយសេរី និងត្រឹមត្រូវនៅកម្ពុជា ហៅកាត់ថា និចហ្វិក (NICFEC) មើលឃើញថា សាររបស់លោក ហ៊ុន សែន នៅពេលនេះ លែងក្លាយជាសញ្ញានៃការបំភ័យពលរដ្ឋម្ចាស់ឆ្នោតតទៅទៀតហើយ។ ក៏ប៉ុន្តែលោកថា នេះអាចជាទម្លាប់ច្រំដែលៗ ដែលលោកនាយករដ្ឋមន្ត្រីតែងតែលើកឡើងជាញឹកញាប់រាល់ពេលលោកថ្លែងសារជាសាធារណៈ៖ «គ្រាន់តែសារចាស់ហ្នឹង គ្រាន់ថាគាត់ធ្លាប់និយាយជាច្រើនដងដែរហើយហ្នឹង។ រឿងគណបក្សប្រជាជនចាញ់ឆ្នោតអាចមានសង្គ្រាមមានអីហ្នឹងណា វាដូចមិនមានអីប្លែកទៀតទេ ខ្ញុំមើលទៅ!»។
ប្រតិកម្មជាថ្មីទៀតរបស់លោក ហ៊ុន សែន ដែលមិនសំដៅចំឈ្មោះនេះ ប៉ុន្តែគេដឹងថា ទំនងជាលោកនាយករដ្ឋមន្ត្រីចង់ដៀមដាមឲ្យអតីតមេបក្សប្រឆាំងដែលធ្លាប់រិះគន់រដ្ឋាភិបាលកាលពីចុងឆ្នាំ២០១៦។
លោក សម រង្ស៊ី ដែលទើបតែលាលែងពីមុខតំណែងថ្មីៗនេះ ធ្លាប់ព្រមានកម្ចាត់ក្រុមឧទ្ទាមដែលលោក សម រង្ស៊ី ចង់សំដៅដល់រដ្ឋាភិបាលរបស់លោក ហ៊ុន សែន។ សាររបស់អតីតប្រមុខដឹកនាំបក្សសង្គ្រោះជាតិ ដែលធ្វើឡើងកាលពីចុងខែធ្នូ ឆ្នាំ២០១៦ គឺសំដៅដល់ការចាញ់ឆ្នោតរបស់បក្សប្រជាជនហើយ តែបើមិនព្រមប្រគល់អំណាចទេ បក្សរបស់លោកនឹងប្រើកម្លាំងកម្ចាត់ចោលតែម្ដង។
បើទោះជាបែបណា លោក ហ៊ុន សែន ពេលនេះបានហៅការអំពាវនាវរបស់អតីតមេបក្សប្រឆាំងថា គួរកុំមានការស្រមើស្រមៃអ្វីជ្រុលពេកអី ព្រោះកម្លាំងយោធានៅក្នុងដៃរបស់លោកនៅឡើយទេ។ លោកបន្តថា វាគួរអាម៉ាស់ដែលលទ្ធផលឆ្នោតមិនទាន់នឹងបានចាប់ផ្ដើមនៅឡើយផង ស្រាប់តែបក្សនយោបាយខ្លះហ៊ានប្រកាសលទ្ធផលឆ្នោតខ្យល់មុនទៅហើយ៖ «មានអ្នកខ្លះហ៊ានទាំងអះអាងថា ដល់ឆ្នាំ២០១៨ នឹងត្រូវបង្ក្រាប បង្ក្រាបយើងទៅទៀត ព្រោះយើងអត់ទទួលលទ្ធផលបោះឆ្នោត។ វាអាចទាយដល់ឆ្នាំ២០១៨ វាថា អាចឈ្នះហើយ បើមិនប្រគល់អំណាចវានឹងបង្ក្រាប។ ហឺ! ទ័ពនៅនឹងដៃអញសោះ! វាទៅរួច ចាំបោះឆ្នោតហើយ ចាំក្រុមប្រឹក្សាធម្មនុញ្ញប្រកាស រួចហើយគណៈកម្មាធិការជាតិរៀបចំការបោះឆ្នោតប្រកាសផ្លូវការបានទេ? ម៉េចបានចាំបាច់ប្រកាសពីឥឡូវ? ប្រកាសលទ្ធផលឆ្នោតពីឥឡូវមិនទាន់បានបោះផង។ រួចឈ្នះៗៗ ដូរៗៗ បានតើដូរពីនៅក្រៅគុកទៅនៅក្នុងគុកទៅ»។
ទោះជាយ៉ាងនេះក្ដី អ្នកនាំពាក្យគណបក្សសង្គ្រោះជាតិ លោក យឹម សុវណ្ណ ថ្លែងថា មកដល់ពេលនេះទៅហើយ គ្មានបក្សនយោបាយណាមួយចង់បានសង្គ្រាមដូចការលើកឡើងរបស់លោក ហ៊ុន សែន នោះឡើយ៖ «តាមធម្មតាកាលណាបើគណបក្សសង្គ្រោះជាតិ ឈ្នះមានន័យថា យើងមានការគាំទ្រទូលំទូលាយពីក្នុងសង្គម និងក្នុងប្រទេស។ ដូច្នេះការគាំទ្រទូលំទូលាយនេះ ហើយជាគ្រិស្តមូលដ្ឋាននៃការចាប់យកអំណាចដោយសន្តិវិធីដូចបណ្ដាប្រទេសគេធ្លាប់ធ្វើនៅលើសកលលោក»។
លោកនាយករដ្ឋមន្ត្រី ហ៊ុន សែន តែងគំរាមជាញឹកញាប់ថា បើបក្សរបស់លោកចាញ់ឆ្នោតនឹងមានសង្គ្រាម ជាពិសេសលោកតែងអះអាងពីកម្លាំងយោធារបស់លោកត្រៀមទប់ស្កាត់រួចជាស្រេចរាល់ការប៉ុនប៉ងណាមួយដែលចង់ផ្ដួលរំលំរដ្ឋាភិបាលស្របច្បាប់របស់លោក។
បញ្ហានេះ ត្រូវបានអ្នកតាមដានពីព្រឹត្តិការណ៍នយោបាយកម្ពុជា យល់ឃើញថា នេះជាសញ្ញានៃការគំរាមកំហែងដើម្បីចង់បានការគ្រប់គ្រងអំណាចបានយូរបន្តទៀតរបស់លោក ហ៊ុន សែន៕
Source : RFA
Source : RFA
ហ៊ុន សែន ព្រមានប្រើកម្លាំងយោធាចំពោះបក្សនយោបាយដែលចង់កម្ចាត់រដ្ឋាភិបាល
Reviewed by Mong Kul
on
11:36 PM
Rating:
Reviewed by Mong Kul
on
11:36 PM
Rating:
